Pomorac Dejan Milošević (33) iz Tivta otisnuo se juče ujutro iz Donje Lastve, na nesvakidašnji pomorski poduhvat – veslanje preko Jadrana, do oko 150 milja od Tivta udaljene italijanske luke Bari .
Milošević vesla sam u plastičnom kanuu dužine nepunih pet metara, a u jedrilici ga prate dvojica prijatelja koji su mu osiguranje i logistička podrška. Naime, hrabri Tivćanin će svakodnevno u kanuu veslati po oko 50 kilometara, nakon čega će noć provesti spavajući na jedrilici, da bi ujutro nastavio veslanje prema italijanskoj obali.
Prvog dana plovidbe, kako nam je danas kazala Miloševićeva supruga, sve je proteklo u redu iako su Dejanu probleme pravili valovi od juga na otvorenom moru pred Bokom i povremena kiša.
Prema njenim riječima, njen suprug računa da će put do Barija, ukoliko sve bude teklo po planu, preveslati za 4 do 5 dana.
