U organizaciji 12. Festivala gudača i Društva prijatelja grada Perasta, u ponedjeljak 21.juna, biće upriličena dva koncerta klasične muzike.
Prvi, matine koncert, u Domu starih ,,Grabovac“ u Risnu, za štićenike i zaposlene ustanove koja je tokom pandemije ponijela ogroman teret, brigu i odgovornost za stara lica, i istog dana u 20 sati u Muzeju grada Perasta.
Nastupit će Klavirski trio ,,Con brio“ kojeg čine akademske muzičarke i mlade umjetnice Sonja Marković (klavir), Sonja Vojvodić (violina) i Ana Zakrajšek (violončelo). Ovaj kamerni sastav djeluje više godina, još od studentskih dana usavršava se i napreduje stalnim angažmanima i javnim nastupima. Na svom repertoaru imaju djela klasične muzike raznih epoha, a njihov moto predstavlja zadovoljstvo zajedničkog muziciranja i rad na popularizaciji klasične muzike i njegovanja pravih i istinskih vrijednosti.
Za dva koncerta u Risnu i Perastu na programu su djela argentinskog kompozitora Astora Pjacole, čija se stota godišnjica rođenja proslavlja u cijelom svijetu.
