Velikom izložbom fotografija, dokumenata i brojnih nagrada i priznanja koje su u tom peridou dobili, i svečanim koktelom na kojem su njene članice po ko zna koji put pokazale svoju fascinatnu gastronomsku i dekoratersku vještinu, Organizacija žena Tivat obilježila je preksinoć u galeriji ljetnjikovca Buća-Luković, 25-tu godišnjicu svog rada. Ujedno je to bila prilika da se obilježi i 10-ta godišnjica čuvenog tivatskog. „Žućenica Festa“ čiji je Organizacija žena jedan od glavnih idejnih tvoraca i organizacionih oslonaca.
Izložba nazvana „napih 25 godina“ privukla je veliki broj posjetilaca, kako članica same Organizacije žena i njihovih porodica, tako i brojnih predstavnika tivatskih ustanova, preduzeća i drugih organizacija sa kojim ova agilna NVO sarađuje.
„Svaka žena drži tri kantuna (ćoška) od kuće, ali evo se iz ovoga vidi da žene Tivta drže tri kantuna od grada!“- čulo se na izložbi, dok je predsjednica Organizacije žena Tivta Blaženka Vučurovića nabrajala brojne humanitarne, kulturne, društveno- odgovorne, zabavne, turističke, čak i diplomatske aktivnosti ove NVO u proteklih četvrt stoljeća.
„Ženski aktivizam u Tivtu ne počinje sa nama, već ima mnogo dublje korene koji se iz raznih dokumenata i novinskih napisa, mogu pratiti još sa početka tridesetih godina 20.vijeka- od Društva za pomaganje siromašne djece, preko Odbora gospođa, preko kasnijih Antifašističkog fronta žena, Udruženja žena Tivat , do sadašnjih NVO- Organizacije žena i Kola srpskih sestara.”- kazala je Vučurović, naglašavajući da ta NVO okuplja dame različite dobi, nacija, religije i politilkih ubjeđenja, ali da sve one djeluju usklađeno i jedinstveno u plemenitim misijima koje ih ispunjavaju, prvenstveno onoj da pomognu drugima i doprinesu da Tivat bude ljepši, uređeniji, kulturniji i zdraviji.
“Žučenica fest”, gastronomske fešte poput “Priče o patišpanju”, “Mocartove čokoladne večeri”, “Večeri karnevalskih kolača”, ”Njokade”, Martovskog bala, brojne izložbe, pjesničke večeri, likovne kolonije, te niz humanitarnih akcija koje su pored ostaloga, rezultirale i nabavkom mamografa za tivatski Dom zdravlja, karakterišu rad ove NVO. Za to su tivatske žene dobile brojne nagrade i priznanja među kojima i ono najveće – “Novembarsku nagradu grada Tivta”. Ipak, ova NVO – neisostavni dio svake javne priredbe, proslave i sličnog događaja u Tivtu, danas se suočava sa problemom koji prijeti da zamrzne njen aktivizam – nedostakom prostora za rad jer je “Organizacija žena” ovih dana od Opštine Tivat dobila dopis da se iseli iz aktuelnih sprostorija koje koristi, u baraci u Kalimanju.
“Tu se održavao kontinuitet naših druženja, koji ni na trenutak nije bio narušen bez obzira na naše starosne, nacionalne, vjerske ili političke različitosti i ubjeđenja. Održati takav sklad u onim ludim i bezumnim vremenima, za mene je najveća vrijednost i smisao našeg postojanja kao organizacije. Tako je bilo, a vrata su za sve bila otvorena. Na žalost, ta vrata se zatvaraju, a koja ćemo otvoriti ne znamo. Dobile smo obavještenje da prostoriju, zbog rušenja barake,moramo napustiti. Nudi nam se prostorija u Domu kulture u Gradiošnici, neadekvatna za naše potrebe. Ne znam da li da plačem, ljutim se ili vrištim. Na koga ? Na one koji su nam godinama obećavali novu prostoriju ili na nas, jer smo očekivali rješenje i živjele u uvjerenju da ovom gradu nešto značimo.Upravo je to i najbolnije. Nakon 25 godina postojanja, toliko evidentnih uspjeha u različitim sferama života, sa tradicijom dugom preko 70 godina, mi postajemo beskućnici.”-zaključila je Vučurović.
