Živuća legenda jugoslovenske ratne brodogradnje i jedan od najbrilijantnih tehničkih umova na ovim prostorima, brigadni general u penziji dr Andrej Korbar, posjetio je juče Tivat gdje su mu domaćini bili predstavnici ovdašnjeg Udruženja „Podmorničar“ koje okuplja bivše jugoslovenske podmorničare.
Korbar koji je i sam bio dugogodišnji podmorničar, posjetio je Zbirku pomorskog nasljeđa Porto Montenegra i njen centralni muzejski eksponat – veliku dizel-električnu podmornicu P-821 „Heroj“. Susret 80-to godišnjeg veterana sa brodom u čijoj je konstrukciji i gradnji sredinom šezdesetih godina prošlog vijeka u Splitu, Korbar bio jedan od glavnih učesnika, bio je vrlo emotivan, pa su mu, kada je stupio u centralu podmornice, suze pošle na oči a glas zadrhtao.
Dok je u pratnji predsjednika Udruženja „Podmorničar“ iz Tivta, kapetana bojnog broda u penziji Rajka Bulatovića, obilazio podmornicu na kojoj je bio prvi upravitelj stroja, Korbar nije krio zadovoljstvo načinom na koji je „Heroj“ obnovljen i sređen kao muzejski eksponat koji danas svjedoči o visokom nivou tehničke i tehnološke kulture i sposobnosti bivše države. Naime, kada je ova podmornica konstruisana i izgrađena u drugoj polovini 60-tih, Jugoslavija se uvrstila u elitni krug samo deset država u svijetu koje su bile kadre da projektuju i grade podmornice kao tehnološki najsloženije ratne brodove.
U narednim decenijama ta se sposobnost razvila do te mjere da je pred raspad SFRJ, čuveni Brodarski institut iz Zagreba na čijem je čelu tada bio upravo Andrej Korbar, projektovao već četvrtu generaciju klasičnih jugoslovenskih dizel-električnih podmornica koje su trebale da pred torpeda i mina, budu naoružane i raketama, kao i novu generaciju malih diverzantskih podmornica u saradnji sa Švedskom, a koje su trebale da dobiju najmodernijih tzv.anaerobni Stirling pogonski sistem, kome za rad nije trebalo napajanje vazduhom.
Korbar je juče Zbirci pomorskog nasljeđa poklonio dvije svoje knjige, a sa domaćinima iz Udruženja podmorničara razgovarao je o produbljivanju saradnje sa Udrugom „Podmorničar“ iz Pule. Ta NVO koja okuplja bivše podmorničare u Hrvatskoj, biće domaćin 53. Međunarodnog kongresa podmorničkih veterana svijeta, koji će se održati u Puli od 24. do 28.maja.
„Očekujemo preko 250 učesnika iz cijelog svijeta, a o koliko važnom događaju je riječ, potvrđuje i činjenica da je pokroviteljica ovog skupa predsjednica Hrvatske Kolinda Grabar-Kitarović.“- kazao je „Vijestima“ Korbar dodajući da u pojedinim aspektima organizacije kongresa podmorničari Hrvatske uspješno sarađuju sa svojim kolegama iz Crne Gore, Srbije i Slovenije. Tako će, pored ostaloga, učesnici kongresa u Puli, biti u prilici da obiđu i podmornice-muzejske eksponate u Zbirci pomorskog nasljeđa u Tivtu, odnosno u u Muzeju vojaške zgodovine u Pivki u Soveniji.
Sa kolegama iz država bivše Jugoslavije, Korbar i ostali stručnjaci iz Hrvatske, razmijeniće mišljenja i na posebnom okruglom stolu o mogućnostima razvoja, proizvodnje i remonta podvodnih objekata u hravtskim brodogradilištima, a koji će se pred Kongres svjetskih podmorničkih veteran, 24.maja održati u Puli.
