Poruka u boci poslata prije 108 godina i pronađena na jednoj njemačkoj plaži potvrđena je kao najstarija pronađena poruka te vrste, objavila je britanska laboratorija za morska istraživanja, prenosi Beta.
Bocu je bacio u Sjeverno more 30. novembra 1906. marinski biolog Džordž Parker Bider, a u njoj je bila poštanska karta na kojoj se poručuje onom ko je nađe da vrati bocu laboratoriji za morska biološka istraživanja u Plimutu (MBA), a da će za to dobiti jedan šiling.
Britanska laboratorija je upravo objavila da je boca koju je na plaži našla jedna njemačka penzionerka u aprilu 2015., 108 godina i 138 dana od kada je bačena u vodu, najstarija poruka u boci ikad pronađena.
Prethodni rekord za takvu jednu bocu koji je registrovala Ginisova knjiga rekorda bio je 99 godina i 43 dana.
“U poruci je traženo od pronalazača da napiše mjesto gdje je boca pronađena, da li je pronađena u moru, ime broda, i da se vrati Džordžu Parker Bideru u Plimutu za nagradu od jednog šilinga”, rekao je Gaj Barker iz britanske laboratorije. Jedan šilig je predstavljao malu sumu i u to vrijeme.
Bider je poslao 1.020 flaša s porukama između 1904. i 1906. On je primijetio da su se one koje su potonule vraćale na britanske plaže, a one koje su plutale išle ka kontinentu. To ga je navelo da zaključi da su duboke morske struje u Sjevernom moru išle od istoka ka zapadu.
Kao što je obećano, pronalazačici boce poslato je pismo zahvalnosti i jedan šiling.
